Aallartisaaneq

Nammineq suliffeqarfimmik aallartitsinissat takorloorpiuk? Siunnersuineq, siunersiuineq sakkussallu suleriusimut ajornannginnerulersitsisut neqeroorutigaagut – tamannalu ilinnut akeqassanngilaq piffissamillu atuiffigissavat.

Aallartisaaneq

Nunap immikkoortuani tamarmi inuussutissarsiornermik ineriartortitsinermik pilersitsinissaq kissaatigaarput, taamaattumillu sulianut tunngasunut immersugassat assigiinngitsut katersorpagut, pilersaarusiornermi aningaasaqarnermilo ikorfartuutaasussat.

Suliffeqarfiup pilersaarutaa

Suliffeqarfiup pilersaarutaa pappiaraannaanngilaq, taanna tassaavoq tamakkiisumik isiginniffissaq periusissarlu. Suliffeqarfiup pilersaarutaani suliffeqarfivit suut suliassarinerai, kikkut sullittassaneritit qanorlu aningaasarsiornissannik allaaserinnissaatit. Pitsaasumik pilersaarusioruit aningaaserivinnik, aningaasaliisussanik suleqatissallu oqaloqatiginissaat ajornannginnerussaaq, taamaasillutit takutissinnaalluassagakku isumassarsiavit aallaqqaataaniit naanissaata tungaanut suliarilluagaanera.

Suliffeqarfiup pilersaarutaanut skabeloni

Ingerlatsinermut missingersuutit

Ingerlatsinermut missingersuut ulluinnarni isersitanut aningaasartuutinullu aqutsilluarnerunissamut iluaqutigissavat. Taamaasiornikkut suliffeqarfiit pilersaarutit malillugit ingerlanersoq takulluarsinnaassavat, arlaatigullu aaqqitassaqarnersoq takusinnaassallugu. Ingerlatsinermut missingersuummi takusinnaassavat ikiortissannik atorfinitsitsisinnaassanersutit, allisarlutit imaluunniit aningaasartuutitigut annikillisaassanersutit. Suliffeqarfimmik peqqinnartumik ingerlatsinissamut sakkussaq taanna pingaarnerpaavoq.

Ingerlatsinermut missingersuummut skabeloni

Pilersitsinissamut missingersuut

Suliffeqarfimmik aallartitsigaanni aallartisarnermut atatillugu aningaasartuutissaqartuaannarpoq, maskiinaniit, atortut tuniniaanermut ininullu sullivissanut. Pilersitsinermut missingersuut oqilisaataassaaq, pissutigalugu aallartisarnissamut aningaasartuutissatut naatsorsuutigisat tamakkiisumik isigisinnaassagakkit. Taamaasillutit iluaalliornartumik tupaallaatissaqarnavianngilatit, kiisalu aningaaseriviup oqaloqatiginissaanut imaluunniit taperneqarnissamut qinnuteqaleruit nukittunerusumik inissisimassagavit.

Pilersitsinissamut missingersuummut skabeloni

Aningaasanik tigoriaannarnut missingersuut

Aningaasat tigoriaannaat aqulluarneqanngippata aamma isumassarsiatsialak ajalusoorsinnaavoq. Aningaasanik tigoriaannarnut missingersuuteqarneq qaqugukkut aningaasanik isertoqassanersoq qaqugukkullu akiliuteqartoqassanersoq takusinnaalluarnerisigut pilersaarusiorluarsinnaanerussaatit. Akileraarutinut, illumik attartornermut akiliutissanut akissarsiassanullu tunngasinnaapput. Aningaasanik tigoriaannarnut missingersuummik pisiviusorsiorpalaartumik peqaruit toqqissillutit pisinnaavutit, taamaasillutit takusinnaassagakku aalajangersimasumik aningaasartuutinut aammalu siunissami pilersitsinissamut aningaasaliisinnaassanerlutit takusinnaassagakku.

Aningaasanik tigoriaannarnut missingersuummut skabeloni